المساعد الشخصي الرقمي

مشاهدة النسخة كاملة : مختارات من رباعيات صلاح جاهين


طبيبة مسلمة
0 08th October 2007, 03:0:12 AM
حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!
===================

يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!
==================

ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي !!
===================

ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي !!!
===================

خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
عجبي !!!!
==================

كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي !!!
==================

وأنا فى الضلام ...من غير شعاع يهتكه
أقف مكانى بخــــوف ولا أتركه
ولما يجى النـــور وأشوف الدروب
أحتار زياده ..أيهم أسلكه؟؟؟
وعجبى
=================


عجبتنى كلمه من كلام الورق
النور شرق من بين حروفها وبرق
حبيت أشيلها فى قلبى .. قالت حرام
ده انا كل قلب دخلت فيه أتحرق
عجبى
==================

لا تجــــــبر الإنسان ولا تــــحيره
يكفيه ما فــيه من عقل بيحيره
اللى النهارده بيطلبه ويشتهيه
هوا اللى بكره حيشتهى يغيره
عجبى !!!!!ا
=================

الدنيا أوضه كبيره للأنتظار.
فيها أبن آدم زيه زي الحمار.
الهم واحد والملل مشترك.
ومفيش حمار بيحاول الأنتحار.
عجبي
================

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن

عجبي !!
==================

كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
عجبي !
==================

أنا قلبى كوره ...والفراودة أكم
ياما اتنطح وانشاط ..وياما اتعكم
واقول له كله حينتهى فى الميعاد
يقول بساعتك؟ ولا بساعت الحكم؟
عجبى!!!!!ا
==================

قالوا الشقيق بيمص دم الشقيق.
والناس ما هياش ناس بحق وحقيق.
قلبي رميته وجبت غيرو حجر.
داب الحجر ورجعت يا قلبي رقيق.

عجبي!!!!
==================

أحب أعيش ولو أعيش في الغابات.
أصحى كما ولدتني أمي وأبات.
طائر حيوان حشرة بشر بس أعيش.
ما أحلا الحياة حتى في هيئة نبات.

عجبي!!!!
==================

سهير ليالى وياما لفيت وطفت
وف ليله كنت راجع قمت شفت
الخوف كأنه كلب سد الطريق
كنت عايز اقتله بس خفت
عجبى
================

الارض شوك أيوه لكين هايش
والحمرة مش يعنى الطريق حايش
دى دمنا السيال . وبشره خير
أن انتى عايشه .و ان انا عايش
عجبى
================

غمست سنك في السواد يا قلم
علشان ما تكتب شعر يقطر ألم
مالك جرالك ايه يا مجنون..و ليه
رسمت وردة و بيت و قلم و علم

وعجبي
===================

اوصيك ياابني .. باليل والزهور
اوصيك.. بليل القاهرة المسحور
وانجيت في بالك
اشتري عقد فل .. لاي سمره
وقبري اوعاك تزور

وعجبي
==================

يا طير يا طاير في السما ..... طز فيك
ما تفتكرش إن ربنا ..... مصطفيك
أصلك من دود الأرض و ليه تعود
تمص فيه يا حلو و .....يمص فيك

و عجبي
===================

أنا شاب لكن عمري ولا ألف عام.
وحيد ولكن بين ضلوعي زحام
خايف ولكن خوفي مني أنا.
أخرس ولكن قلبي مليان كلام
عجبي!!!!!!!!
===================

أنا قلبى كوكب وانطلق فى المدار
حواليكى يامحبوبتى يانور ونار
يلف مهما يلف مابيكتفيش
وتمللى نصه ليل ونصه نهار
عجبى !!!!ا
====================


عجبى على العجب العجيب العجاب
لما الحقيقه تطل بعد احتجاب
وتروق وتحلا وفجأه تصبح مفيش
كمثل طراطيش بحر ياما خد وجاب
عجبى !!!!!!ا
======================



ليه ياحبيبتي ما بينا دايماً سفر
ده البعد ذنب كبير لا يغتفر
ليه يا حبيبتي ما بينا ديماً بحور
أعدي بحر.... آلاقي غيره اتحفر
عجبي

====================

اتمنى ان اختياراتى تكون عجبتكم

شكرا

المحارب10
0 08th October 2007, 08:0:07 PM
مشكوره اخت طبيبة مسلمة

كل الود

ღملاكღ
0 09th October 2007, 04:0:33 AM
طبيبة مسلمة


[فقط الأعضاء المسجلين والمفعلين يمكنهم رؤية الوصلات]

طبيبة مسلمة
0 14th October 2007, 07:0:04 AM
مشكورين اخوانى على المرور الحمد لله عجبكم الموضوع