المساعد الشخصي الرقمي

مشاهدة النسخة كاملة : (((يشحن لها الجواااااااال من غير تكليف)))


بدوي رومانسي
0 30th June 2009, 09:0:57 AM
[فقط الأعضاء المسجلين والمفعلين يمكنهم رؤية الوصلات]
اتخذ بعض الشباب من شحن الجوال للفتيات وسيلة لهتك أعراضهن وتدنيس شرفهن
لكن الحرة الأبيّة (تجوع ولا تأكل بثدييها)
هذه القصيدة الجميلة المعبرة للشاعر(نايف معلا العتيبي وقد شارك بها في شاعر المليون)
*** *** ***
ياليتني مـا رحـت لمجمّـع السِيـف
اللي على سيف البحـر فـي المنامـه

ولا لقيـت اللـي عليهـا التواصيـف
اللـي تمـشّـى ماعليـهـا لثـامـه

بنتٍ حلاها فـي المخاليـق ماشيـف
ومن شافها يمكن يطلّـق ( مدامـه )

والله ليمسـي بيـن هـم وتحاسيـف
والله ليصبح ما اهتنـى فـي منامـه

جمالهـا مافيـه زيــفٍ وتزيـيـف
وزودٍ على ذلـك علـى الخـد شامـه

يعني وش أبا أقول وش عاد أبا أضيف
فاتن حلا ، ماهـي بـ(فاتـن حمامـه)

عيونٍ وسـاع ورمـوشٍ معاكيـف
وخدٍ تقـول البـدر ليلـة تمامـه

وخشمٍ ماهو ببعيد عن سلّـة السيـف
وعنقٍ طويل وفيـه سَكبـة زعامـه !

وفـمٍ صغيـر وجمرتيـنٍ موالـيـف
فيهن مـن التـوت المخمّـر علامـه

وحبـات رمـانٍ وراهـن مصافيـف
بيـضٍ تجسّـد روعـة الابتسـامـه

وصـدرٍ حمـل تفاحتيـنٍ مواقـيـف
إليا مشـت تقـول يمشـن أمامـه ؟

والباقـي مشفـّر ولا فيـه توصيـف
وياربـي استـر لا تقـوم القيـامـه

وإلا الهوى ماهوب ضحك وسواليـف
قدامه أشجـع رجـل تبـرد عظامـه

راعيـه عُرْضَـه للشقـاء والتكاليـف
ولا علـى راعيـه نـقـد ومـلامـه

تلقى حياتـه كلبوهـا عواصـيـف
مشتـتٍ محـدٍ بـعــارف نظـامـه

لا حَنّ عَـدّا فـوق روس المشاريـف
وجاوب بعالي الصوت نـوح الحمامـه

يحـب ميـر الحـب مابـه تصانيـف
ولا فيـه بطّلنـا ! ولا بـه سـلامـه

معزّبٍ.. سجـان مـا همّـه الضيـف
لـو إن ضيفـه يستحـق الكـرامـه

وحب الشرف يزيد الأشراف تشريـف
يا طيـب راس اللـي تقلّـد وِسامـه

والحب تال الوقـت صابـه تخاليـف
مافيـه لا عِفّـه ولا بــه شهـامـه

متخلّفه تضحك علـى لحيـة خليـف
وخليـف قرنـه واصـلٍ لا سنـامـه

تقول له : ياخليـف سيـد العواريـف
أنتـه هـوى قلبـي وغايـة مرامـه

أصنّفـك لـو كـان للحـب تصنيـف
أنتـه حبيبـي بعـد بـابـا ومـامـه

وخليف معها ما حسـب للمصاريـف
وهـو مطفّـر لـو يفـخّـم كـلامـه

يشحن لها الجوال من غيـر تكليـف
وليتـه يحصّـل مـا يوفّـر طعامـه

وإن غاب عنها يوم من غير تسويـف
رجع وفـي نبـرات صوتـه فخامـه

وقال أعذرينـي كنـت والله بـ ( جنيف )
والمشكلـه حـدّه طُعـوس الثمـامـه

ولا حصّلت لـ خليف مخرج وتصريف
دقـّت علـى خليفـة خليـف أسامـه

وهكذا والأخ مـن زيـف فـي زيـف
والعكس صح وكل شخـص ومقامـه

وأنا ما أحرّف سيرة الحـب تحريـف
الحـب مـا يشبـه حلالـه حـرامـه

وختامها مـا رحـت لمجمّـع السِيـف
ولا لقيـت أحلـى بنـات المنـامـه

قصة مولّفهـا مـن الـراس توليـف
لـو مبتـدا علمـي يناقـض ختامـه :Oc_sun1:

ريـــانة الغصن
0 30th June 2009, 10:0:22 AM
وحب الشرف يزيد الأشراف تشريـف
يا طيـب راس اللـي تقلّـد وِسامـه

الله الله يا بدوي,,

صح لسانك ولسان شاعرها,,

صباح معطر برضا الرحمن,,

دمت بنقاء,,

[فقط الأعضاء المسجلين والمفعلين يمكنهم رؤية الوصلات]

بدوي رومانسي
0 30th June 2009, 02:0:49 PM
الله الله يا بدوي,,

صح لسانك ولسان شاعرها,,

صباح معطر برضا الرحمن,,

دمت بنقاء,,

[فقط الأعضاء المسجلين والمفعلين يمكنهم رؤية الوصلات]

صباح الخير والسرور والسعادة
أهلا بالمشرفة المتألقة
سلمت على المرور
والرد

المحارب10
0 30th June 2009, 05:0:20 PM
وعليكم السلام ورحمة الله وبركاته

اختيار ذوق

تسلم يابدوي على النقل وبورك فيك

دمت بنقاء

بدوي رومانسي
0 01st July 2009, 06:0:51 AM
وعليكم السلام ورحمة الله وبركاته

اختيار ذوق

تسلم يابدوي على النقل وبورك فيك

دمت بنقاء

سلمت أبو خالد
وأشكرك