المساعد الشخصي الرقمي

مشاهدة النسخة كاملة : قصيدة عزوبي طريفه


سندس 2009
0 04th July 2009, 04:0:45 AM
السلام عليكم ورحمة الله وبركاته




قصيدة عزوبي طريفه


هذي قصيدة وصلتني على الايميل وحبيت انقلها لكم لعلكم تضحكون كما ضحكت :


البارحة جاني من الحب مرسال

من عقب ما بيني وبينه خصيمة



وانا ترى في الحب مانيب فعّـــال

ولا بعد ولّع بقلبـــــــــــي هشيمه



ولا بعد غنّيت في ســـــاعة وصال

ولا بعــــــــد ذقت الفـراق وجحيمه



ولا جرى دمعـــــي على الخد همّال

ولابعـــــــد جربت مـــــــــرّ الهزيمة



حتى وردني تالي الليل جــــــــــوال

وانا على شــــــاهي وبسكوت ديمة



الرقم بايخ لكــــــــــن الصوت قتال

كنه مثل صـــــــوت المذيعة حليمة



قالت مساء الخيـــــر يا طيّب الفال

قلت ارحبــــــــي ترحيبةٍ مستديمة



بالعود والصفري ودلة وفنجـــــال

واجبك يا بنت الأصول الكـــــريمة



ردت بضحكة ثم قالت وش الحال؟

قلت اشهد إن الحال عقبك سقيمة



قالت وهي تضحك بعد مثل الأطفال

وانا بعد كـــــــــني بدونــــــك يتيمة



من يـــــوم قالتها تزلزلت زلزال

من فجعتي كنــــي مسوي جريمة



قلت ارفعي صوتك ترى مابه ارسال

كـــــــــــذاب لكــــنّ المصيبة عظيمة



قالت أقول اسمع ترى هرجنا طال

ممكن تصاحبني ترانــــــي وسيمة



واسمي الحقيقي أول حروفه الدال

لكن يسمّونـــــــــي البنات الزعيمة



صحيح أحب الفخفخة واعشق المال

لكن تراني طــاهــــــــــرة مستقيمة



ما عندي امغازل ولا (لعب يهّال)

ما عندي إلا في الشرف والحشيمة



بس الصراحة قلبي لشوفتك مـــال

واصبحت وحدك جالسٍ في صميمه



فكّر بعقلك واتـــــــرك القيل والقال

واحذر تطيع اهل العقول العقيمة



وارسل علي الحين خمسمية ريال

أشحن بها جوال أختــــي غنيمة



أو طقم غالي فيه خاتم وسلسال

أروح به في عرس ولاّ عزيمة



قلت الحقيقة مانيب رجل أعمال

ولاني بتاجر والموارد عديمة



أنا الصراحة شبه عطّال بطّال

وعلاقتي بالفقر جـــداً حميمة



والراتب الله يرحم الحال ما زال

محدود والمصروف ربي عليمه



والدين بالآلاف والبنك شغّــال

ياكل فلوســي بالربا والظليمة



والسوق طايح والغلا ضيّق البال

والموت والله صاير اكبر غنيمة



قالت تحمّل بس والحمل ينشال

خلك شديد الباس صلب العزيمة



ياخي تصرّف جعلك اتصير نشّال

أهم شـــــي إن النوايـــــا سليمة



لابد تفهمني على كل الأحـــــوال

ما دمت من أهل العقول الفهيمة



قلت إيه والله فاهم اللي على البال

لكن تــــــرى هذي علينا قـــــديمة



يا بنت هذا صاير اليــــوم مــوال

للي تبــي تلعب على ابن اللئيمة



يا بنت ما تدرين كم فيه محتـــال

يلعب على الحبلين وانتي غشيمة



يا بنت كم من جاهلة دمعها سال

من عقب ما جات العواقب وخيمة



والبنت لا اقفى عرضها بيد الأنذال

والله مـــــا يبقـــــى لها أي قيمــة



قالت تبي ولاّ فخلّك على جــــــــال

مهوب ناقصي نصـــــــايح حكيمة



عز الله إنك للأسف منت رجّــــــال

وانـــــك قليل الذوق ما فيك شيمة



يا لعنبو اللي ما يسطّرك بنـــعال

حتـــى يعلمـــــك الغزل يا بهيمة


تفوعليك وصكّت الخط في الحال


مدري تفو هي مدح ولاّ شتيمـة



وسلامتكم

الوهاااج
0 04th July 2009, 04:0:50 AM
بكل اسف إن هذا حال بعض الفتيات في هذا الزمن


سلمت اناملك اختي الكريمة سندس على روعة اختيارك

خالص التحية

القلب الحنـون
0 04th July 2009, 08:0:00 AM
سلمتى وسلمت يمناك اختى
على هذى الابيات الرائعة
وللامام دوووووووما يارب
تقبلى كل تقديرى واحترامى

بدوي رومانسي
0 04th July 2009, 09:0:02 AM
هههههههههههههههههه
أنا أشهد لله إنه شاعر ومتمكن وعبقري
صراحة حظه إنه فقير
شكرا يا أخت سندس2009
ذوق في اختياراتك
ومتميزة
شكرا

المحارب10
0 05th July 2009, 05:0:16 PM
هههههههههههههههههههههههههههههه

برافو عليه

صح لسانه ولسانك اختي سندس وتسلم الايادي

دمت بنقاء

ريـــانة الغصن
0 10th July 2009, 03:0:42 PM
تفوعليك وصكّت الخط في الحال


مدري تفو هي مدح ولاّ شتيمـة

هههههههه

بهــَــي الحالة أكيد مدح,,

الله ستره,, لو مشي معها كان نتفت ريشه!!

جزاك الجنة أخيتي,,